ចិន៖ ក្រុមហ៊ុនយក្សផ្នែករថយន្តអគ្គិសនីរបស់ចិន BYD កំពុងស្ថិតក្នុងដំណាក់កាលចុងក្រោយនៃកិច្ចចរចាជាមួយរដ្ឋាភិបាលហុងគ្រី ទៅលើកិច្ចព្រមព្រៀងដែលមានតម្លៃរាប់ពាន់លានអឺរ៉ូ ដើម្បីវិនិយោគលើការដំណើរការរោងចក្ររថយន្តអគ្គិសនីថ្មីមួយ ខណៈកិច្ចព្រមព្រៀងនេះត្រូវគេរំពឹងថានឹងអាចប្រកាសជាផ្លូវការនៅចុងសប្តាហ៍នេះ។ នេះបើយោងតាមប្រភពដែលចេញផ្សាយដោយទស្សនាវដ្ដី Financial Times។ ប្រភពដដែលក៏បានបញ្ជាក់ឱ្យដឹងថា ក្រុមហ៊ុនកំពុងសម្លឹងមើលការផលិតរថយន្តអគ្គិសនី និងការផលិតអាគុយនៅរោងចក្រថ្មីមួយក្នុងតំបន់ Szeged ភាគខាងត្បូងនៃប្រទេសហុងគ្រី។

កន្លងមក BYD ក៏ធ្លាប់មានការដំណើរការផ្នែករថយន្តក្រុងក្នុងប្រទេសនេះហើយដែរ ប៉ុន្តែក្រុមហ៊ុនយក្សចិនមួយនេះនៅតែបន្តសម្លឹងរកឱកាសក្នុងការពង្រីកសង្វាក់ផលិតកម្មរបស់ខ្លួនបន្ថែមទៀត ក្នុងគោលបំណងប្រកួតប្រជែងផ្នែកទីផ្សារទល់នឹងរថយន្តអគ្គិសនីអឺរ៉ុប ខណៈការចរចារវាងក្រុមហ៊ុនជាមួយរដ្ឋាភិបាលនៅតែបន្តយ៉ាងរលូនកាលពីថ្ងៃព្រហស្បតិ៍ម្សិលមិញ។ 

នាយករដ្ឋមន្រ្តីហុងគ្រី លោក វិកទ័រ អរបាន (Viktor Orban) និយាយនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ម្សិលមិញនេះថា លោករំពឹងថាតំបន់ភាគខាងត្បូងប្រទេសហុងគ្រីនៅជិតទីក្រុង Szeged នឹងទទួលបានអត្រាកំណើនការងារខ្ពស់បន្ថែមទៀត ក្រោយពីមានការសម្លឹងឃើញសក្ដានុពលនៃការវិនិយោគដោយក្រុមហ៊ុនធំៗរបស់់ពិភពលោក។ 

យ៉ាងណាក្តី ក្រុមហ៊៊ុន BYD និងរដ្ឋាភិបាលប្រទេសហុងគ្រីផ្ទាល់ ពុំទាន់មានបទអត្ថាធិប្បាយណាមួយឡើយជុំវិញការចុះផ្សាយរបស់ទស្សនាវដ្ដី Financial Times នេះ។ ដោយឡែក គេហទំព័ររបស់រដ្ឋាភិបាលចិន ដែលមានមូលដ្ឋាននៅទីក្រុង Shenzhen ដែលជាទីតាំងនៃទីស្នាក់ការរបស់ក្រុមហ៊ុន BYD ដែរនោះ ធ្លាប់បានចេញផ្សាយនូវអត្ថបទមួយកាលពីខែតុលាដែលនិយាយថា លោក Viktor Orban ធ្លាប់មានជំនួបជាមួយប្រធានក្រុមហ៊ុន BYD គឺលោក វ៉ាង ឆ័នហ្វូ (Wang Chuanfu) ក្នុងដំណើរទស្សនកិច្ចមួយនៅក្នុងទីស្នាក់ការរបស់ក្រុមហ៊ុន BYD៕